Pilason ang duha ka persona sa nagluntad nga pagpangluthang sa San Juan Bonifacio nga sakop sang Barangay 5, siudad sang San Carlos, Negros Occidental subong gid lamang nga aga sang Martes, Oktubre 24, 2023.
Base sa pagpangusisa sang Radyo Bandera, ginkilala ang biktima kay Melmar Pamilar alyas “Beboy” samtang ang 18-anyos nga babayi nga nadalahig ang ginkilala naman kay Rica Jane Delgado.
Ginapahayag sang manug-deliver sang tubig nga nakit-an niya nga nagalagsanay si Pamilar kag ang suspek.
Matapos ang pila ka minutos, ginluthang sang suspek sang lima ka beses si Pamilar rason nga natumba ini sa duta.
Ginpalapitan sang suspek kag ginluthang pa sa ulo si Pamilar apang nakalikaw ini kag nakaangkon lang sang gamay nga pilas sa agtang.
Suno pa sa saksi nga matapos magpalagyo ang suspek, nagtindog pa si Pamilar apang natumba ini gilayon bangud sa iya mga naangkon pa nga igo sang bala sa paa.
Dugang pa sang saksi nga samtang may nagaluntad ang pagpangluthang, may naglabay nga isa ka babayi kag na-igo sang duha ka bala ang iya paa.
Gilayon naman nagresponde ang duha ka ambulansya kag gindala ang duha ka biktima sa ospital agud mahatagan sang medikal nga atensyon.
Ginpahayag pa sang saksi nga nakasuksok sang bonnet, jacket kag tsinelas ang suspek kag ini ang may niwang nga panglawason.
Ginatinguhaan karon sang Radyo Bandera nga hibaluon ang iban pa nga mga detalye.*
