Ginbawian sang kabuhi ang isa ka habal-habal driver matapos ginpulihan sang buno sang duha ka lalaki sa St. Peter National Highway, Barangay 5, siudad sang San Carlos, Negros Occidental, takna las 9:45 sang aga subong nga Martes, Oktubre 24, 2023.
Ginkilala ang biktima kay Danilo Ambayan y Legaria, 53-anyos, habal-habal driver, may live-in partner kag residente sang San Juan Tunga, Barangay 5, San Carlos City.
Samtang, wala pa makilal-an ang mga suspetsado apang ang isa diri amo si alyas Baldo, nakasuksok sang itom nga jacket kag isa ka tricycle driver kag ang isa naman ang nakasuksok sang shorts kag puti nga t-shirt.
Base sa inisyal nga imbestigasyon sang San Carlos City Police Station, ginsaysay sang mga saksi nga nagluntad ang lalisanay sa tunga sang biktima kag suspek nga si alyas Baldo.
Matapos ang lalisanay, naghalin si alyas Baldo agud mangayo sang back up kag makaligad ang pila ka oras, nagbalik sa lugar si alyas Baldo upod ang wala pa makilal-an nga lalaki kag hinali na lamang nila ginpulihan buno ang biktima.
Nakaangkon sang madamo nga buno sa lawas ang biktima rason nga gindala ini sa San Carlos City Hospital agud mahatagan sang medikal nga atensyon, apang gindeklarar ini nga dead on arrival.
Padayon naman nga ginapangita sang mga otoridad ang mga suspetsado nga nagpalagyo matapos ang kremin.*
