BACOLOD CITY– Love triangle ang ginalantaw nga motibo sa pagbuno sa isa ka estudyante sa nagluntad ang komosyon sa Purok Fire, Barangay 8 sa siudad sang Bacolod kagab-i, Pebrero 12, 2023.
Ginkilala ang biktima kay Nico Sona, 28-anyos, residente sang nasambit nga lugar apang ang suspek naman ang ginkilala kay Ramie Val Araiz alias “Ramram”, 27-anyos, residente sang Purok Sigay, Barangay 2.
Takna las-7:30 kagab-i, nakabaton sang tawag ang kapulisan may angut sa insidente.
Suno kay Police Captain Jonito Pastrana, hepe sang Police Station 2, bangud sa panagupnop sang suspek nga may iban na nga lalaki ang iya live in partner, naglakat ini sa balay sang iya abyan kun sa diin iya natukiban nga may yara man gid.
Nagluntad ang komosyon sa tunga nanday Araiz kag Sona tubtob nga ginbuno sang suspek ang biktima sang duha ka beses sa likod kag kilay gamit ang kutsilyo.
Gilayon nagtambag si Kirt Sona, amay sang biktima, gin-uyatan ang kamot kag ginbuno man ang suspek sa likod.
Gindala ang pilason nga biktima sa Riverside Hospital.
Nakapalagyo ang pilason nga suspek kag nagpadulong sa Corazon Locsin Montelibano Memorial Regional Hospital.
Gindakup naman si Kirt Sona kag gindala sa Bacolod Station 2.
Nakadepende kay Araiz kun pasakaan niya ini sang frustrated homicide.
Apang suno kay Pastrana nga kun lantawon, nagbulig lang man ang amay bangud ginadepensahan niya lang ang iya nga bata.
Samtang si Araiz naman ang sarang magapangatubang sang kaso nga frustrated homicide.
Sa madumduman, ang suspek nga si Araiz amo ang biktima nga gintiro sadto anay sa isa ka Pisonet station sa Purok Sigay, Barangay 2 sa syudad sang Bacolod, sadtong Nobyembre 28, 2022.*