Nalakip ang mga bombero nga nagaresponde sa pagkasunog sang kabukiran sa mga nagkalamatay sa Europe nga naga-antos subong sang tuman ka init nga panahon.
Nagtuga ang tig-ilinit sang madamu nga wildfires ukon pagkasunog sa kabukiran sa mga pungsod sang France, Portugal, Spain, kag Greece.
Nagaresponde ang mga firefighting aircraft agud matapna ang paglapta sang kalayo sa mga kabukiran kun diin isa ka waterbombing plane ang nag-crash ukon naghugpaas sa northern Portugal nga nagresulta sa pagkapatay sang piloto.
Indi magnubo sa 360 ang mga napatay sa Spain samtang indi man magnubo sa 238 ang mga napatay sa Portugal bangud sa “heatwave”.
Kalakip sa mga nagkalamatay amo ang mga may edad na kag mga exposed sa mainit nga panahon pareho sang street cleaners ukon nagapanglimpyo sa dalan.
Indi sa gihapon makontrol ang paglapta sang kalayo sa mga kabukiran sa Espanya samtang padayon ang evacuation sang mga pumuluyo agud masalbar ang ila kabuhi.
