Nasapwan nga wala na sang kabuhi ang isa ka fishpond caretaker nga may igo sang bala sa likod nga bahin sang iya ulo sa Purok Aguihis, Barangay Canmoros, banwa sang Binalbagan, subong nga Lunes, Setyembre 18, 2023.
Ginkilala ang biktima kay Sanirod Tresmilla y Demesana, 44-anyos, kag residente sang Barangay Himaya, banwa sang Hinigaran.
Base sa report sang Binalbagan Municipal Police Station, takna las 7:45 sang aga nakit-an nanday Cris Demasana kag Jestrell Duenas ang bangkay sang biktima nga nagahiligdaon sa duta sa ginabantayan sini nga fishpond.
Nahibaluan nga nakaangkon ang biktima sang igo sang bala sa likod nga bahin sang iya ulo, nga posible nga gintunaan sang iya gilayon nga kamatayon.
Nagapadayon pa sa karon ang imbestigasyon sang mga kapulisan agud mahibaluan kun ano ang motibo kag kun sin-o ang suspek sa kremin.*
