Ginaganyat karon sang National Food Authority (NFA) ang tanan nga mga Local Government Unit (LGU) sa Negros Occidental nga mag-augment sang pondo para sa pagbakal sang humay sa mga mangunguma sa probinsya.
Suno kay Governor Eugenio Jose Lacson nga ginhimo sang P19 per kilo ang baklanay sang NFA nga humay agud mabuligan ang mga mangunguma nga makatibawas sa kapierdihan bangud sa mga naglaslas nga bagyo sa pungsod.
Suno pa kay Lacson nga ginaganyat niya ang mga LGU nga dugangan sang P1 tubtob P3 kun magbakal sang P19 per kilo sang NFA para madamo pa ang mabuligan nga mga mangunguma.
Ginpaathag ni Lacson nga magluwas sa LGU, ginahingyo naman sang NFA ang Gobyerno Probinsyal nga magdugang sang pondo agud magtaas ang buying price sang bugas kag magtaas man ang income sang mga mangunguma.
Pahayag naman ni Engineer Albert Barrogo Assistant Regional Director sang Department of Agriculture (DA) nga nagahatag sang bulig ang ahensya sa mga mangunguma nga apektado sang bagyo kag iban pa nga kalamidad pinaagi sa paghatag sang binhi kag abono.*
