Nagapanawagan ang mga pumuluyo sang Sitio Tikoy-Tikoy, Barangay Cabacungan, La Castellana, Negros Occidental sa lokal nga panguluhan nga mahatagan kuntani sang igtalupangod ang taytay sa nasambit nga lugar kun sa diin gina-alegar nahulog sa suba kag nalumos ang 3-anyos nga bata nga babayi sadtong tinalikdan nga Biyernes, Setyembre 15.
Suno sa mga concerned citizen, madugay na nila nga ginaproblema ang nasambit nga taytay bangud tuman nga delikado ini para sa mga residente, ilabi na kun kada naga-ulan kag nagataas ang lebel sang tubig sang suba.
Nahibaluan nga ang Sitio Tikoy-Tikoy ang katapusan nga Sitio sang Cabacungan sa idalom sang ‘jurisdiction’ sang La Castellana.
Ini nga taytay ang gina-agyan sang mga pumuluyo padulong sang Sitio Ubay, Barangay Guinpanaan nga nasakupan sang banwa sang Moises Padilla.
Nagalaum naman ang nga pumuluyo nga pinaagi sa Radyo Bandera, mapalab-ot sa igtalupangod sang mga opisyal sang banwa ang ila panawagan.*
