BACOLOD CITY – Igapaidalum sa medical examination ang 23-anyos nga babayi nga gin-alegar gin-abduct kag ginhimuslan sang tatlo ka wala pa makilal-an nga mga lalaki sa syudad sang Bacolod, pasado las 5 sang hapon, Huwebes nga adlaw, Agosto 18.
Suno kay P/Capt. Armilyn Vargas, hepe sang Police Station 3, nagpadulong na sa istasyon ang biktima agud magpaidalum sa medical examination para man mahibaluan kung may yara sang pagpanghimulos sa iya ukon wala kag mahibaluan man ang mga “substance” nga yara sa biktima bangud nag-alegar ini nga may ginpainom nga bulong sa iya.
ALLEGATIONS
Gin-alegar sang biktima nga halin ini sa ulobrahan kag nagsakay ini sa jeep nga nagabiyahe Pepsi-NGC padulong sa North Terminal sa Barangay Bata. Sa Lopues East nga bahin siya nagsakay.
Suno pa sa panaysayon sang biktima sa kapulisan, duha sila ka mga pasahero nga nagsakay sa jeep tubtob naglab-ot sa Bata. Lowbat ang iya nga cellphone gani nagpakitluoy ini sa isa niya ka upod nga pasahero nga mahulam siya sang cellphone agud nga makalog-in sa Messenger kag ma-message ang iya magulang nga mapasugat ini sa Bata.
Nag-una panaug ang isa ka pasahero nga babayi.
Apang, suno sa biktima, sang yara na sila sa atubangan sang isa ka hardware, may tatlo ka mga lalaki nga sakay sang duha ka motorsiklo ang nagbutong sang iya buhok, naghakwat sa iya, kag nagbutang sa motor.
Ginpatung-an siya sang duha ka mga lalaki sa motor kag ginpiringan sang face towel. Wala niya mahibaluan ang direksyon sang gindal-an sa iya.
Nakita niya na lang ang dako nga balay kag may hiligdaan nga papag. Iya pa gin-alegar nga may tableta nga ginbutang sa baso kag ginpainum sa iya antis ini ginhimuslan sang tatlo ka mga lalaki.
Sa interview sang pulis sa biktima, nakita niya ang oras sa iya cellphone nga alas 2 bangud nga may nagsulod nga mensahe. Wala niya lang nakuha ang cellphone bangud napit-alan sang isa sa mga suspek.
Nag-ilis sang hinay-hinay ang biktima kag nagpalagyo paagi sa paggwa sa buka nga bintana.
Gindugang pa sang biktima nga nalipungan siya kag may nagbulig nga babayi sa iya kun sa diin ginhakwat siya sakay sa salakyan kag sang nakita ang ID nga taga Silay ini, ginpukaw siya sang babayi sang yara na sila sa Brgy. Guinhalaran.
Sa ila pag-abot sa barangay, nakapangayo bulig ang biktima sa migo sang iya amay.
Nagapanawagan karon ang kapulisan sa naka-witness, sa driver sang jeep, sa upod sini nga babayi nga pasahero kag sa isa pa gid ka babayi nga gin-alegar nagbulig sa biktima nga magpakig-angut sa utoridad bangud dako gid ang mabulig nila sa kasolbaran sang kaso.
INCONSISTENCIES
Bangud indi man manigar nga madamo ang inconsistency sa statement sang biktima, suno kay Vargas, iga-consider man nga ini posible bangud sa trauma sang biktima nga indi pa stable bangud sang kakapoy kag nerbyos.
Sa bahin sang kapulisan, sila ang magahatag sang “benefit of the doubt” kag magapatigayon sang ma-id-id nga imbestigasyon base sa alegasyon sang biktima.
CCTV
Ginapakuha na karon sang kapulisan ang CCTV footages sa atubangan sang hardware kung diin gin-alegar gin-abduct ang biktima.
Sa bulig sang medico legal kag scientific evidences, nagapati si Vargas nga magakasanagan gid ang ini nga insidente.
Nagpakig-angut naman sila sa mga northbound nga jeepney drivers.
Tatlo ka semana pa lang nga naga-obra ang biktima sa Bacolod.
NO SUSPECTS YET
Suno kay Vargas, wala pa sila sang persons of interest sa insidente.
Wala man sang description ang biktima sa mga suspek bangud suno sa iya, naka-bonnet ang mga ini.
APPEAL
Naga-apelar naman si Vargas nga kung may kasubong nga insidente, magreport diretso sa kapulisan agud mahatagan sang gilayon nga aksyon.
Suno sa hepe, ini nga insidente ang indi lahog-lahog kag indi dapat pag-gamiton agud makatuga sang public alarm bangud indi lang ang natungdan nga pamilya ang mahalitan kun indi pati man ang iban.
Gin-pasiguro naman ni Vargas nga safe sa gihapon ang Bacolod.*
