KABANKALAN CITY- Tatlo ka cellphones kag P1,000 nga cash nga nakasulod sa sling bag ang nakuha sa isa ka 63-anyos nga babayi samtang nagakatulog sa Carnaval Area, Barangay 4, syudad sang Kabankalan, Negros Occidental pasado las 6:00 sang aga sang Huwebes, Agosto 18.
Suno sa Kabankalan City Police Station, nagakatulog ang biktima nga si Elena Gerona nga residente sang Sitio Bagacay, Barangay Daan Banua, sa nasambit nga syudad sang nagsulod ang suspek sa iya balay-balay kag hinali ginkuha ang pink nga sling bag nga may unod nga cash nga nagabalor sang P1,000 kag mga cellphone nga Samsung nga de-keypad, Vivo 1606, kag Vivo Y11.
Sang nabugtawan si Gerona, diri niya natalupangdan nga wala na ang iya mga gamit kag gilayon nga nagreport sa police station.
Nakabaton naman sang tawag ang mga kapulisan halin sa isa ka concerned citizen sa Barangay 9 sa syudad sang Kabankalan nga may nagbaligya sa iya sang ginapatihan ginkawat nga cellphone nga nagabalor lamang sa P500.
Ginkumpirmar sang kapulisan nga kaangot ini sa ginreport nga pagpangawat kag bangud diri, tigayon nga nakilal-an kag nadakpan ang suspek nga si Alfred Laurita, 20-anyos nga residente sang dalan Coloso, Barangay 6, sa nasambit nga syudad.
Naarekober sa supek ang Vivo 1606 nga cellphone.
Yara sa kustodiya sang Kabankalan CPS ang suspek kag natalana nga pasakaan sang kaso nga theft.
