Nadakpan ang isa ka gina-alegar notorious nga kawatan bangud wala makaguwa sa modernized jeep matapos nagpangawat sang tinalikdan nga adlaw, Abril 25 sa Rizal Street, Barangay 12, Bacolod City.
Ginkilala ang lalaki kay Ryan Rendon, 43-anyos, may asawa, residente sang Purok Cagaycay, Barangay 2, sa kapareho nga siudad.
Suno kay Police Major Elmer Bonilla, hepe sang Bacolod City Police Station 1, samtang nagabiyahe ang jeep, nakita sang amay sang biktima nga ginakawat ang cellphone sang iya anak.
Gilayon nagkinagamo ang mga tawo sa sulod sang jeep matapos nadakpan sa akto sang amay ang lalaki.
Samtang naga-panic ang kawatan, ginsirad-an sang driver ang jeep agud indi ini makaguwa.
Dugang pa ni Major Bonilla, nga bag-o lang si Rendon nakaguwa sa prisuhan sa kaso nga paglapas sa Republic Act 9165.
Subong nga adlaw, Abril 27, ginpasakaan na sang kaso si Rendon nga “theft”.*