Patay ang isa ka ginapatihan police asset matapos ini ginluthang sang wala pa nakilal-an nga riding in tandem suspects sa Camp Valdez, Barangay Mambaroto, syudad sang Sipalay, takna las 2:30 sang hapon, Miyerkules, Disyembre 14, 2022.
Ginkilala ang napatay nga biktima kay Jomel Espora, yara sa legal nga pang-edaron kag residente sang Barangay 5 sa nasambit nga syudad.
Suno sa inisyal nga imbestigasyon sang kapulisan, nagabiyahe sakay sang motorsiklo ang biktima upod ang back rider sini nga ginkilala kay Rogie Fajardo, 23-anyos sa National Highway sang nasambit nga barangay.
Matapos ang pila ka minutos, hinali na lang sila ginbalabagan sang wala pa nakilal-an nga riding in tandem suspects kag ginpaarakan tiro ang mga biktima.
Nakaangkon sang mga pilas sa lawas ang duha ka biktima kag gilayon sila gindala sa ospital apang gindeklarar nga dead on arrival si Espora.
Suno sa pag-usisa sang Radyo Bandera sa mga pumuluyo sa lugar, mabuot kag wala sang kontra si Espora kag masami ini naga-upod sa mga ginahiwat nga aktibidad sang kapulisan sa ila nga syudad.
Sa karun, nagapadayon ang imbestigasyon sang mga kapulisan angut sa nagluntad nga insidente.*
