Patay ang isa ka 17-anyos nga estudyante sang mahulog ini halin sa ika-anom nga panalgan sang isa ka building sang San Beda College sa Barangay Alabang, Muntinlupa City takna las 12:05 sang udto kagapon sang Huwebes, Pebrero 9, 2023.
Suno sa pahayag sang saksi nga si Jasmin Aspuria Romano, canteen concessionaire sang nasambit nga eskwelahan, sang gin-park niya ang iya salakyan sa atubang sang Lady of Monserrat Building sang hinali na lang nahulog ang Grade 12 student nga biktima.
Nagresponde naman ang school nurse nga si Airon Joris Aman nga naghatag sang first aid sa biktima antes ini ginhingagaw dala sa Asian Medical Hospital apang ginbawian ini sang kabuhi takna la 1:16 sang hapon.
Nagapatigayon karon ang mga otoridad sang imbestigasyon sa insidente para hibaluon kun aksidente nga nahulog ukon boluntaryo nga naglumpat ang biktima.
Ginatinguhaan man nila hibaluon kun may natabo nga foul play sa insidente.*
