BACOLOD – Masobra P4 milyones nga balor sang ginasuspetsuhan shabu ang nakumpiskar sa ginpatigayon nga buy-bust operation sa Purok Tangigue, Brgy. 1, siudad sang Bacolod sang Huwebes sang gab-i, Pebrero 9.
Nadakpan ang duha ka ginakabig sang kapulisan nga high-value individuals (HVI) nga sanday Eric Aguirre, 22-anyos kag Jhonie Cabrillos, 27-anyos; lunsay wala sang trabaho kag mga residente sang nasambit nga purok.
Base sa report sang Bacolod City Police Station 2, nakumpiskar sa mga suspek ang walo ka sachets kag pito pa ka putos sang ginasuspetsuhan shabu nga ginabulubanta nagabug-at tanan sang 600 ka gramos kag nagabalor sang P4,080,000.
Pagadal-on ang mga suspek sa nasambit nga police station para sa nagakaigo nga disposisyon.
Nagapang-atubang ang mga ini sang mga kaso sa paglapas sa Republic Act No. 9165 ukon ang Comprehensive Dangerous Drugs Act.
