SAN CARLOS CITY – Isa ka gina-alegar “notorious” ukon bantog nga kawatan ang ginkastigo sang pumuluyo sa may dalan H.C. Rigor, Brgy. 3, siudad sang San Carlos las-11:35 kagab-i sang Huwebes, Pebrero 9 matapos madakpan nga nangawat sa duha ka mga balay sa lugar.
Suno sa report sang San Carlos City Police Station, ginkilala ang suspetsado nga si Philip Edison, 27-anyos nga residente sang Purok Malinawon, Brgy. Poblacion, banwa sang Toboso, kag may una na ini nga mga kaso sang pagpangawat sa nagkalain-lain nga mga banwa kag siudad.
Base sa inisyal nga impormasyon, una nga ginbiktima sang suspek ang balay sang 48-anyos nga si Jinky Tornes sang hapon kun diin ginkuha sini ang duha ka mga laptop, isa ka iPhone 7, isa ka Samsung S9 plus, duha ka power banks, kag isa ka extension wire.
Ginabulubanta nga nagabalor sang P55,000 ang kagamitan nga ginkuha kay Tornes.
Suno sa amay nga si Marlon Tornes, nakibot ini sang mag-abot sa balay bangud guba na ang puertahan kag wala na ang nasambit nga gadgets.
Nagpadulong ini sa police station agud i-report ang natabo takna las says sang gab-i.
Las onse sang gab-i, nakabaton sila sang impormasyon nga ginakastigo ang suspek sang mga residente matapos madakpan nga nagsaka sa isa pa ka balay.
Dala pa sang suspek ang bag kun diin nakasulod ang laptop ni Tornes apang isa na lamang ka laptop ang narekober kag wala na ang iban nga gadgets.
Yara na ang suspek sa kustodiya sang San Carlos CPS para sa nagakaigo nga disposisyon kag nagapang-atubang ini sang kaso nga robbery.
