Napuno sang paso ang dapadapa, tiil, nawong, kag iban pa nga bahin sang lawas sang totoy nga si “Princess,” apat ka bulan nga Belgian Malinois, sa nagluntad nga sunog sa siudad sang General Santos.
Takna las dos sang kaagahon sang Huwebes, Abril 20, nabugtawan na lamang ang totoy kag ang magpamilya nga nagakasunog na ang ila balay.
Hinali nga nagdinalagan paguwa ang kada isa agud makaluwas.
Apang sige taghol si Princess sa wala mahibaluan nga rason.
Sang makuha ni Princess ang atensyon sang tag-iya sang balay, nagdalagan ang totoy pasulod sa nagakasunog nga balay.
Ginkakibot ini sang tag-iya apang nagsunod ini sa totoy.
Didto natukiban nga nabilin kag nagakatulog sa kuwarto ang 5-anyos nga bata nga babayi.
Gilayon nga ginhakwat sang amay ang bata kag nagdalagan paguwa samtang nagalikaw sa kalayo kag nagakahulog nga kagamitan kag mga parte sang nagakasunog nga balay.
Nagsunod naman ang totoy sa gin-agyan sang amay kag masuwerte nga nakaluwas sila tanan.
Nagapaayo na si Princess sa mga paso nga iya naangkon sa nagluntad nga sunog.
