Apektado gihapon ang mga hog raisers sang Negros Island sa ginpapanaog ni Cebu Governor Gwendolyn Garcia nga Executive Order no. 9, nga nagapalawig sang banning sa mga hogs kag pork products nga makasulod sa probinsya sang Cebu tubtob Abril 20, 2023.
Sandig sa nasambit nga EO ginadumilian ang pagpasulod sang mga idik, buhi nga baboy kalakip na ang mga produkto nga gikan sa baboy kasubong sang chicharon, chorizo, pork tocino kag lechon baboy nga nagahalin sa Negros Island bangud sang African Swine Fever ukon ASF.
Madumdoman nga una nga nagpaguwa sang EO si Garcia sang tinalikdan nga bulan kun sa diin ginadumilian sini ang pagpasulod sang mga pork products kag mga buhi nga baboy tubtob petsa 6 sini nga bulan matapos makarekord ang probinsya sang Cebu sang pinakauna nga kaso sang African Swine Fever (ASF) sa siyudad sang Carcar.
Sa karon nagdangat na sa 12 ka mga local government unit (LGUs) sa probinsya sang Cebu ang may positibo nga kaso sang African Swine Fever.
Ginapatihan sang mga opisyales sang Cebu nga ang baboy nga nagpositibo sang ASF sa siyudad sang Carcar ang nagagikan sa isa ka stockyard malapit sa mga baboy nga ginabiyahe halin sa Negros Island.
Apang sandig sa report sang Bureau of Animal Industry (BAI) nagapabilin nga ASF-free ang mga probinsya sang Negros Oriental kag Negros Occidental taliw-as sa ginpahayag ni Governor Garcia.
Samtang, bangud sa nagapadayon nga banning sang Cebu, ang mga hog raisers sang Negros Occidental ang nagapadala na lamang sang ila mga baboy sa Metro Manila kag iban pa nga bahin sang Luzon.
Suno kay Provincial Veterinarian Dra. Placeda Lemana, medyo manubo gawa ang baklanay sang buhi nga baboy sa Luzon apang mas maayo na lamang ini nga option sang mga negosyante sang baboy sa probinsya.
Sandig sa report sang PVO nagdangat na sang 9,200 ang gin shipped nga mga buhi nga baboy sa Luzon humalin nga nagsugod sang banning ang probinsya sang Cebu.
Sa pihak nga bahin, agud ma proteksyunan naman ang P6 Billion nga hog industry sang Negros Occidental, nagpaguwa sang joint executive order damlag lang ang Negros Occidental kag siyudad sang Bacolod nga nagadumili sang pagpasulod sang mga buhi nga baboy, idik kag iban pa nga mga pork-based products gikan sa probinsya sang Cebu.*
