Nadakpan ang isa ka lalaki nga suspetsado sa pagpangawat sa isa ka bakeshop matapos ini nakilala pinaagi sa nabilin sini nga identification (ID) cards.
Nakuhaan pa sang CCTV footage ang pagtaya sang kutsilyo sang suspek sa cashier sang isa ka bakeshop sa siudad sang Valenzuela.
Ginkuha sini ang yabi sang kaha kag gindala ang cash box antes gilayon nga nagpalagyo.
Apang wala ini kabatyag nga nabilin sini ang iya pouch kun diin nakasulod ang iya mga ID.
Gilayon nga nakilala ini sang kapulisan kag gindakop sa iya balay.
Nakumpirmar man nga siya ang suspek bangud amo sa gihapon ang iya ginasuksok nga bayo, base sa CCTV footage.
Nahibaluan nga ginbilin man sang suspek ang cash box kag kutsilyo bangud may naglagas sa iya kag bangud indi niya man ini mabuksan.
Apang suno sa cashier, kulang sang P3,500 ang unod sang narekober nga cash box.
Ginpahayag naman sang suspek nga kinahanglan sini sang kuwarta bangud bag-o pa lamang ini nagsugod magtrabaho bilang call center agent kag wala pa ini masuweldohan.
Dugang pa sini, kinahanglan niya ang kuwarta para ibayad sa renta kag iban pa nga balayran.
Magapang-atubang ang suspek sang kaso nga ‘robbery with threat and intimidation’.
