Trending ang isa ka menor-de-edad nga babayi matapos magpakita sang iya alatrasan kag dughan samtang nagasaot sa MO2 Ice Bar sa Smallville Complex sa siudad sang Iloilo.
Makita sa video ang 17-anyos nga naka-panty lamang sa idalum, gin-alsa pa sini ang iya bayo, kag iya lamang mga kamot ang gintabon sa pribado nga mga parte sa babaw sang kaagahon sang Agosto 6, 2023.
Base sa interview sang Radyo Bandera Iloilo sa dalagita, 15-anyos pa lamang ini sang magsugod saot sa mga bar apang suno sa iya, wala ini naga-inom bangud may ovarian cyst ini.
Nagpadulong ang menor-de-edad sa Boracay kun diin ini na-rescue sang Radyo Bandera Kalibo kag Radyo Bandera Iloilo kaupod ang iya amay kag mga katapo sang Municipal Social Welfare and Development Office kag kapulisan sang Malay, Aklan.
Na-turnover na ang 17-anyos sa iya mga ginikanan kag nagbalay sang assessment, intervention, kag iban pa nga bulig ang Iloilo City Social Welfare and Development Office.
Samtang nagpangayo naman sang pasaylo ang dalagita sa management sang bar matapos ini temporaryo nga ginpasira ni Iloilo City Mayor Jerry Treñas angut sa iya ginhimo.
