Agud malikawan ang sakit nga leptospirosis, ginlunsyar sini nga Setyembre 14 sa syudad sang Marikina ang isa ka programa kun diin pwede ibaylo sa kuwarta ang madakup nga ilaga.
Sa idalum sang “Rat to Cash” program, P200 ang igabayad sa mga madakup nga ilaga nga may kabug-aton nga 150 gramos pasaka.
Apang suno kay Marikina Mayor Marcelino Teodoro, pagabayran man ang madakup nga mga gagmay nga ilaga.
Magatapos naman ang nasambit nga programa sa Setyembre 16 nga ginsugudan sadtong tuig 2020.
Ginpahayag ni Teodoro nga target sang syudad nga mangin “zero” ang kabilugan nga kaso sang leptospirosis.
Yara sa 3 ka kaso sang leptospirosis ang narecord sa Marikina sini nga tuig, kumparar sa 8 nga kaso sadtong nagligad nga tuig.
Nagpaandamn naman ang lokal nga gobyerno sa mga magapangdakup sang ilaga nga magasuksok sang proteksyon sa kamot kag maghugas pagkatapos.
Sandig sa datus sang Department of Health, 1,467 ang kabilugan nga kaso sang leptospirosis nga narecord sa bug-os nga pungsod sumugod Enero tubtob Agosto kag nagdangat naman sa 205 nga mga indibidwal ang napatay sa nasambit nga sakit.
