Nakuha sa isa ka iloy ang P560 nga cash kag duha ka mga cellphones matapos ini ginholdap sa iya ginasakyan nga tricycle sa dalan Reclamation Area, malapit sa dako nga mall, sa syudad sang Bacolod sini lamang nga hapon sang Martes, Agosto 30.
Suno sa biktima, kaupod sini ang iya duha ka gagmay nga mga kabataan kag iya senior citizen nga iloy kag magakuha sila kuntani sang bayad sa ila ginprenda nga duta sa C.L. Montelibano Avenue.
Apang wala sila nahatagan sang cheke kag nagdesisyon ang mga ini nga mapauli na lamang sa ila puluy-an.
Gindulugan ang magpamilya sang pula nga tricycle nga Rusi kag ginkasugtan sang drayber kag iloy nga P150 ang bayad.
Nakibot ang biktima nga may backrider nga niwangon nga lalaki nga nagasuksok sang jacket.
Sang nag-abot na sila sa Reclamation Area, didto gintayaan sang backrider sang gina-alegar ice pick ang li-og sang biktima kag nagdeklarar sang hold-up.
Padayon nga nagabiyahe ang drayber samtang ginasumbag sang backrider ang biktima sa nawong agud makuha ang sling bag kun diin nakasulod ang P560 nga cash kag duha ka cellphones.
Ginpapanaog sang mga suspek ang mga biktima sa Purok Lampirong sa Barangay 2 samtang hinali nga nagpalagyo ang mga suspek.
Nagpadulong ang mga biktima sa Bacolod City Police Station 2 agud magpasaka sang kaso batuk sa mga suspek.
