Ginbawian sang kabuhi ang 46-anyos nga iloy matapos matampukan sang tubo nga karga sang truck sa Barangay Tabu, banwa sang Ilog, Negros Occidental subong nga aga sang sang Biyernes, Setyembre 29, 2023.
Ginkilala ang biktima kay Alma Claridad, may bana kag duha ka mga kabataan, kag residente sang nasambit nga banwa.
Base sa pagpangusisa sang Radyo Bandera, nagalakat ang biktma upod ang iya bana sa kilid sang karsada agud magpadulong kuntani sa ila gina-obrahan nga kampo.
Didto na nila nakita nga daw indi na makataklad sa pasaka nga karsada ang truck nga may karga nga tubo nga ginabulubanta nagabug-at sang 40 ka tonelada.
Bangud diri, nag-panic ang biktima kag naglumpat sa kilid sang karsada kun sa diin man natumba ang truck bangud ginaalegar nga naglupok ang pang-ulihi nga bahin sang royda sini.
Natampukan naman sang tubo ang biktima nga posible nga gintunaan sang iya gilayon nga kamatayon.
Ginbuligan naman sang mga residente nga kutkuton ang lawas sang biktima nga natampukan sang mga tubo.
Nagahilibion kag nagasinggitan ang bana bangud sang kaakig kag kasakit nga nabatyagan samtang ginakutkot ang lawas sang biktima.
Nakig-angut naman ang mga otoridad sa tag-iya sang truck agud madakpan ang driver nga ginkilala kay Rolly Mendoza nga nagpalagyo matapos ang aksidente.*