BACOLOD CITY – Sa sulod sang isa ka semana halin Nobyembre 14 tubtob 20, nakakumpiskar ang Bacolod City Police Office sang 85.5 gramos ukon P581,800 nga balor sang shabu, suno sa report sang BCPO nga ginrelease subong nga Martes, Nobyembre 22, 2022.
Lima ka anti-drug operations ang ginpatigayon sang kapulisan sa syudad kung diin lima ka drug personalities ang nagkaladakpan kag napasakaan sang kaso sa paglapas sa Republic Act 9165 ukon Comprehensive Dangerous Drugs Act of 2002.
Samtang, 9 naman ka police operations ang ginpatigayon sa kampanya batuk wanted nga mga persona kung diin lima ka most wanted persons kag apat ka iban pa nga nagapangatubang sang nagkalain-lain nga kaso ang na-aresto.
Sa kampanya batuk loose firearms kag “Oplan Katok”, isa ka armas kag isa ka explosive ang gin-surrender sa BCPO.
Tatlo naman ka mga nagapanahor ang nadakpan sa pagpatigayon sang police operation batuk illegal gambling. Nagapangatubang sang kaso sa paglapas sang Presidential Decree 1602 nga naga-prescribe sang mas mabug-at nga penalidad sa illegal gambling.
Nakuha man ang P76 nga bet money kag gambling paraphernalia.
Gin-remind naman ni P/Col. Thomas Joseph Martir ang mga operating units nga mag-“step-up” kag mas pabaskugon ang ila operations ilabi na sini nga Christmas holidays.*
