ISA KA PULIS SA NEGROS OCCIDENTAL, NAGAPANGATUBANG SANG DISMISSAL MATAPOS GIN-ALEGAR NAGPOSITIBO SA PAG-USAR SANG ILIGAL NGA DROGA

Nagapangatubang sang dismissal sa serbisyo ang isa ka pulis halin sa Negros Occidental Police Provincial Office matapos gin-alegar nga nagpositibo sa pag-usar sang iligal nga droga.

Suno kay Police General Debold Sinas, tagpamuno sang Philippine National Police nga si Patrolman Nicolas Martinez ang sa karon restricted sa quarters samtang nagapaidalum sang pre-charge investigation kag summary dismissal proceedings sa sulod sang 60 ka adlaw.

Si Martines kag 53 ka iban pa nga pulis ang gin-subject sa random drug testing sang Regional Crime Laboratory Office-6 sang Marso 16 kag 18, 2021.

Ang 53 ang negatibo ang resulta, samtang ang urine specimen ni Martinez ang kumpirmado nga may traces sang methamphetamine ukon shabu.