Nagsugot nga magpanira sa Easter Sunday ang mga resort owners sa Barangay Granada kag Alangilan sa siudad sang Bacolod.
Ini ang ginkumpirmar ni Vice Mayor El Cid Familiaran sa Radyo Bandera, matapos ang ila ginpatigayon nga pagsinapol subong nga adlaw kaupod si Mayor Evelio Leonardia.Suno sa bise alkalde, ini agud nga malikawan ang pagdagsa sang mga tawo sa maabot nga Domingo.Damlag pa nga naghisugot man ang mga beach resort owners sa Barangay Pta. Taytay nga indi sila magbukas sa amo man nga adlaw.
Bisan ang government center grounds ang ginpasiradan man sang alkalde tubtob Abril 4 matapos ini ang ginadagsa kada gab-i sang mga pumuluyo.Gindugang pa sang bise-alkalde nga indi pa niya makumpirmar kun malakip diri ang mga coffee shop owners.
Ang ini nga tikang ang ginhimo sang city officials agud mapunggan ang gulpi nga pagsaka sang Covid-19 infection, matapos nakarecord ang Bacolod sang sunod-sunod nga double digit new cases kag base sa realtime data sang Emergency Operations Center Task Force, may yara sang 35 ka new cases subong nga adlaw.
Natalana man nga mapagpaguwa sang executive order ang alkalde para sa mas istrikto nga pagsulundan sa mga mass gatherings kag minimum health protocols.|
