KABANKALAN CITY – Ginpahayag sang umagad ni Jomarie Calumba, isa sa gina-alegar mga katapo sang New People’s Army (NPA) nga napatay sa engkwentro sa Brgy. Oringao sa siudad sang Kabankalan, nga indi NPA si Jomarie kag naulamid lamang ini sa engkwentro.
Suno sa umagad, ginpahayag sang saksi nga nagasaylo si Jomarie sang iya sapat sang nakit-an, ginguyod, kag ginhampak ini sa ulo sang mga soldado.
Nanindugan ang umagad nga wala nagapakigbahin ang 47-anyos nga si Jomarie sa hublag sang rebelde nga grupo kag wala ini sang armas luwas na lamang sa sundang nga ginagamit sini.
Nagapanawagan man sang hustisya ang umagad kag pamilya ni Jomarie, “…hustisya kay tadlong man mi nangabuhi. Wala mi sala. Nauban mi sa giyera.”
Si Jomarie nga residente sang Bugni sa nasambit nga barangay pa lamang ang nakilala sa tatlo nga mga napatay sa nagluntad nga enkwentro.