BACOLOD CITY – Isa ka backhoe ang nasunog sa Hacienda San Juan Del Monte, Purok Narra sa Barangay Malingin, syudad sang Bago, Negros Occidental, takna las 8:30 sang gab-i, sadtong Sabado, Pebrero 4.
Naka-park ang backhoe mga 100 metros ang kalayuon halin sa suba, suno sa spot report nga ginpadala sang Bago Police Station sa Negros Occidental Police Provincial Office.
Base sa pagpang-usisa sang kapulisan, naglakat ang checker kag caretaker agud magbakal sang pagkaon sa malapit nga tiyange mga las 6:30 sang gab-i.
Sa ila pagbalik, nasunog na ang backhoe.
Wala naman sang may nakita ang mga residente sa lugar malapit sa lugar nga tawo nga naghalin sa nahamtangan sang backhoe.
Suno sa caretaker kag tag-iya sang backhoe nga wala man sila sang may nabaton nga mga pagpamahog ukon extortion letters halin sa iban nga tawo antis sang insidente.
Gina-imbestigaran pa sang Bago Bureau of Fire Protection ang gintunaan sang sunog.
Suno naman sa hepe sang Bago Police Station nga si P/Lt. Col. Joem Malong, duha ka mga anggulo ang ila ginalantaw.
“We are looking into two angles nga basi may nagsunog gid man sang backhoe or may faulty wirings lang didto or nag-ground lang ang mga wirings didto that’s why nasunog ni siya,” suno kay Malong.
Agud mahibaluan gid ang rason sang pagkasunog, nagkuha sang mga samples kagapon sang wirings kag iban pa agud ipaidalum ini sa electrical and chemical analysis para sa presence sang accelerator kapareho sang gasolina.
“Mas conclusive na gid siguro ang mahatag naton nga information once nga magwa to siya ang result and the result would take around 30 to 45 days pa daw kay padala pa ni siya sa national headquarters sang Bureau of Fire Protection,” dugang pa ni Malong.
Wala naman sang may nasamaran apang damaged naman ang backhoe nga sadtong Setyembre 2022 lang ginbakal sang tag-iya.
Kalabanan, ang bili sang backhoe ang naga-range sa P5 Million kung brand new.
Base sa inisyal nga imbestigasyon sang Bago BFP, kapin P1 tubtob P2 Milyones ang cost of damage sa backhoe.*
