Ginpasakaan sang kaso nga cyberlibel ni Atty. Vince Tañada kag iban pa nga mga producers sang pelikula nga “Katips” ang komedyante nga si Julia Parizcova Segovia.
Suno kay Tañada, ila ginreklamo si Juliana bagud sa mga malisyoso nga post sini sa social media kaangut sa pagdaug sang “Katips” sa tinalikdan nga FAMAS Awards.
Ginsumiter naman ni Tañada kag iya mga co-producers sa piskalya ang kaso.
Gindugang pa sini nga kinahanglan nila tudluan sang leksyon si Juliana kag iban pa nga mga nagalapta sang fake news agud mabuhinan kag matapna ang disinformation sa social media.
“Ang alam ko nai-file na nila ‘yon sa piskalya at hinihintay na lang natin yung decision about that. Nasaktan sila dahil libelous nga naman ‘yung sinabi ni Juliana Parizcova,” pabutyag ni Tañada.
Madumduman nga nagpahayag si Juliana nga madamo ang nakuha nga awards sang “Katips” sa 70th FAMAS bangud si Tañada ang direktor sang awards night sadtong nagligad nga tuig.
Nalakip pa sa post ni Juliana ang mga screenshots sang closing credits sang 69th FAMAS kun diin makita nga si Tañada ang direktor sang awards night.
“Babatiin ko na sana yung humakot daw ng awards sa FAMAS at pelikulang pa-victim na kunwari tinatapangan para itapat sa Maid in Malacañang, kaso andaming resibo. Sige na nga… Congrats Hahahaha!” suno sa post ni Juliana.
