BACOLOD CITY—Ginatutukan karon sa ginapatigayon nga imbestigayon sang mga kapulisan ang iligal nga druga nga isa sa mga motibo sa pagtiro-patay sa isa lalaki sa Brgy. 2 siudad sang Bacolod kagab-i.
Madumduman nga gindeklarar nga dead-on-arrival sa ospital ang biktima nga si Eduardo Garcia, 48-anyos sang Brgy. 2 matapos ini nga ginluthang sang duha ka wala pa makilal-an nga mga suspetsado.
Nahibaluan nga samtang, nagalakat si Garcia matapos ini nga nagbakal sa isa ka balaligyaan sang barbeque, hinali lang ini nga gintiro sang duha ka mga suspetsado gamit ang wala pa mahibaluan nga armas luthang. Ang isa sa suspek ang sakay sa yellow nga Honda XRM nga motorsiklo nga wala sang plate number samtang ang isa naman ang sakay sang Blue raider motorcycle kag wala man sang plate number.
Nakaangkon sang pilas sa iya right temple ang biktima samtang gilayon naman nga nagpalagyo ang mga suspetsado.
Sa karon nagapadayon pa ang imbestigasyon sang Police Station 2 natuhoy sa nasambit nga insidente.