Base sa nakuha nga report sang Radyo Bandera, nagnubo ang fire incident sang tuig 2020 kung ikumparar sang tuig 2019 bangod sang pandemic sa Bacolod City.
Sang tuig 2019, base sa record, naglab-ot sa 505 nga mga fire incident ang nagluntad kag kalabanan diri amo ang Grass Fire/Sugarcane kag mga electrical post fire.
Ang amount naman sang na-damage ukon nahalitan ang nagdangat sa P84, 538,000.
Samtang, sandig naman sa pahayag ni fire marshal sang Bacolod City Fire Station, Fire Chief Insp. Rodel Legaspi, isa naman sa kabangdanan kung nga-a nagnubo ang mga fire incident sang tuig 2020 magluwas sa masupog nila nga kampanya, nagpabilin ang mga tawo sa ila mga puluy-an rason nga napaiway ang pagluntad sang sunog bangod man sa mga quarantine measures.
Base sa record, may 262 ka mga fire incident nga nagluntad sang 2020 kag nagdangat naman sa P7,015, 706 ang total damage.
