‘Kalbo’ ginatudlo nga nagsugo ukon ‘higher mastermind’ sa pagpatay kay Gov. Degamo

Isa ka bulan matapos sang pagpatay kay Negros Oriental Governor Roel Degamo, amat-amat nga nagakumpleto na ang detalye sa pagpatay matapos madakpan ang ginatudlo nga “co-mastermind” nga si Marvin “Halaman” Miranda sang Lunes, Abril 3.

Suno sa Department of the Interior and Local Government (DILG), si Miranda ang ginapatihan nga “co-mastermind” nga nag-recruit sa mga anay soldado kag iban pa nga mga suspek nga nagpatay kay Gov. Degamo.

Ginatudlo ni Miranda si “boss idol,” “big boss,” ukon “kalbo” ang nagsugo sa pagpatay kay Gov. Degamo.

Luwas kay Miranda, yara na sa Philippine National Police (PNP) ang 11 tanan ka mga suspek sa pagpatay sa gobernador kag walo ka iban pa nga mga biktima sa banwa sang Pamplona sang Marso 4, 2023.