Nagapaandam ang Pontevedra Police Station batuk sa mga indibidwal nga ang modus amo ang pag-gamit sang module agud makapangawat sa mga kabataan nga wala sang ginikanan ukon sa mga dalagko nga balay.
“Sa tanan nga pumuluyo sang Pontevedra, ang inyo kapulisan sa pagpamuno ni PCAPT HANCEL P. LUMANDAS, nagapahibalo sa inyo nga may bag-o subong nga modus operandi ang mga malain nga tawo kag ang ila mga target amu ang mga kabataan nga wala upod nga ginikanan o dalagko sa balay,” suno sa post sang Pontevedra Police Station.
Ang tawo ang gin-alegar nagapakuno-kuno nga naga-obra sa Department of Eductaion kag iya paga-usisaon ang module sang mga kabataan kag iya man ini pagatudluan.
Apang, likom sa ihibalo sang tagbalay, pagakuhaon gali ang cellphone kag kwarta sang bata.
Ginahingyo sang kapulisan ang mga pumuluyo nga makipag-angot gilayon sa ila hotline number 09998171462 ukon sa barangay kon may kasubong nga hitabo nga magluntad ukon may makita nga makaduluda kag bag-o nga tawo sa mga kabaranggayan.*