NEGROS OCCIDENTAL– May person of interest na ang kapulisan sang EB Magalona sa nagluntad nga pagpangluthang-patay sa isa ka Barangay Kagawad sa banwa sang EB Magalona kagab-i, Pebrero 15, suno kay Police Major Kenneth Jay Gratones, hepe sang E.B. Magalona Police Station.
Ginkilala ang biktima kay Ian Negrido, 45-anyos kag residente sang Barangay 18-A sa siudad sang Victorias.
Pahayag ni PMaj. Gratones, samtang nagapauli ang biktima halin Bacolod padulong Victorias, ginluthang ini sa Bangga Pepe, Barangay San Jose, E.B Magalona sang indi pa mapangalanan nga suspetsado.
Suno naman sa mga residente anum ka lupok ang nabati-an nila sa lugar kun diin nagluntad ang pagluthang-patay sa kagawad.
Gilayon gindala ang biktima sa ospital apang gindeklarar ini nga dead on arrival.
Dugang pa ni Gratones nga nakita sa dash cam ang salakyan nga gingamit sa nagluthang-patay sa biktima.
Luyag naman magpasaka sang kaso ang pamilya sang biktima.
Pahayag pa ni Gratones, posible “murder” ang igapasaka sa suspek.
Sa subong, nagapadayon ang autopsy sa biktima.*
