Ginpahayag ni PLt. Col. Jesus Mesahon, hepe sang San Carlos City Police Station nga wala sila sa gihapon sang persons of interest sa pagluthang-patay sa 39-anyos nga mekaniko sa Sitio Talave, Barangay Punao, siudad sang San Carlos, takna las 9:00 sang gab-i, Miyerkules, Setyembre 13, 2023.
Ginkilala ang biktima kay Junrell Pancho, mekaniko, kag residente sang Sitio Dela Rosa, Barangay Buenavista, banwa sang Calatrava.
Suno kay Mesahon, ang biktima nagamaneho sang iya motorsiklo kaupod ang iya pakaisa gikan sa Sitio Talave padulong sa Barangay Punao sang sila ang gintupungan sang gina-alegar riding-in-tandem suspects kag ginluthang si Pancho.
Na-igo sang bala si Pancho sa guya rason nga ginbalikan pa ini liwat sang mga suspek tigayon nga napatay ang biktima.
Dugang pa ni Mesahon, tubtob sa karon wala pa sila sang persons of interest angut sa pagluthang-patay kay Pancho kag indi pa nila establisyar ang motibo sa kremin.
Pahayag ni Mesahon, nagapadayon pa ang ila imbestigasyon angut sa nasambit nga kremin.*
