UPDATE—Wala sa gihapon nakilal-an ang tigulang nga nasapwan sa kilid dalan sang Hacienda Otelia, Barangay Efeginio Lizares, syudad sang Talisay subong nga aga sang Biyernes, Setyembre 15.
Sa interview sang Radyo Bandera kay PMaj. Welfredo Benoman Jr., Deputy Chief of Police sang Talisay City Police Station, may nabatian ang mga residente sang duha ka lupok kaina sang kaagahon malapit sa lugar kun sa diin nasapwan ang bangkay.
Dugang pa ni Benoman, apisar nga may nakita sila nga duha ka pilas sa ulo sang biktima, indi pa nila karon matumod kun gunshot wounds ukon stab wounds ini bangud ginahulat pa nila ang resulta sang post-mortem examination.
Pahayag pa ni Benoman nga may nagalapta nga impormasyon nga gina-alegar nga may problema sa paminsaron ang biktima kun sa diin masami ini nagalagaw sa nasambit nga lugar.
Suno pa kay Benoman, indi taga-Talisay ang biktima bangud wala sang may nakakilala sa tigulang. Nagapadayon karon ang imbestigasyon sang mga kapulisan angut sa nagluntad nga insidente.*
