Ginbawian sang kabuhi ang isa ka mangunguma samtang pilason naman ang utod sini matapos ginpulihan labo sa Purok Asoc, Barangay Pinaginpinan, siudad sang Kabankalan, takna las 7 sang gab-i, Huwebes, Setyembre 14, 2023.
Napatay ang biktima nga ginkilala kay Alijandro Blanco y Gersin, 62-anyos, samtang ang pilason naman ang utod sini nga si Bellias Maquiling y Blanco, 53-anyos.
Samtang, ang mga suspetsado ang ginkilala sanday Raffy Blanco y Pilingon, 47-anyos; Jade Blanco y Factor, 27-anyos; kag Rene Blanco y Gersin, yara sa ligal nga pang-edaron.
Suno kay Police Captain Joelan Vinson, deputy chief of Police sang Kabankalan City, ang mga imbolbado ang magpamilya man lang sa diin si Alijandro, Bellias kag Rene ang mag-utod, si Raffy ang ila pakaisa kag bata naman ni Rene si Jade.
Base sa report sang mga otoridad, matapos mag-inom-inom ang tatlo ka mga suspek, ginsulong nila si Alijandro dala ang tabas kag espading.
Didto na ginpulihan labo sang tatlo ka suspek si Alijandro nga nag-igo sa iya likod, ulo, kag siko nga posible gintunaan sang iya kamatayon.
Sang nakita naman ni Bellias ang natabo sa iya utod, nagtinguha ini nga magtambag apang nalab-an ang iya ulo.
Pahayag ni Vinson nga daan nga hiligut-anon angut sa duta ang motibo sa kremin.
Nakahunong naman karon si Raffy kag Jade sa kustodiya sang mga kapulisan matapos ang mga ini nga magsungka, samtang nagapabilin naman nga ’at-large’ si Rene.
Posible nga magapangatubang sa kaso nga frustrated murder ang tatlo ka mga suspetsado.*
