NEGROS OCCIDENTAL– Ginpahayag ni Police Major Ruel Cullanag, Hepe sang Candoni Municipal Police Station nga may mga saksi na sila nga nakatudlo sa identity sang mga suspek kag nakahatag sang testimoniya may angut sa brutal nga pagpatay sa mag-amay nga sanday Edmundo Castro, 45-anyos kag iya menor de edad nga anak.
Sila man ang gintudlo nga suspek sa pagpatay sa gina-alegar nagabusong nga babaye nga si Analie Emaray, 44-anyos sadtong Pebrero 4, 2023 sa Sitio Buyong, Brgy. Cabia-an, Candoni, Negros Occidental.
Suno kay Cullanag indi niya mahimo nga mapalayag ang mga pangalan sang nga suspek apang ginsigurado sini nga may yara sila sang mabakod nga testimoniya kag ebidensya nagikan sa mga saksi.
Madumduman nga ginpahayag sadto ni Cullanag nga sandig sa imbestigasyon nahibaluan nga tatlo na ka adlaw nga nagapangita sang ila nadula nga karbaw ang mag-amay tubtob nakalab-ot sila sa lugar.
Ginapatihan nga posible may nag-luntad nga komporontasyon sa tunga nanday Edmundo kag mga suspek nga nag-resulta sa pagpangluthang kag pagpanglabo.
Nadalahig naman sang amo nga insidente ang ginaalegar nagabusong nga si Analie Emaray.*
