Nagdamu ang mga indibidwal nga positibo sa dengue sini nga tuig sa bilog nga Pilipinas.
Base sa record sang Department of Health (DOH), 27,670 ang kadamuon sang mga indibidwal nga nagpositibo sang dengue virus sa pungsod, humalin sang Enero 1 tubtub Marso 18, sini nga tuig.
Sang tuig 2022, may yara lamang sang 14,278 ka mga persona nga infected sang dengue virus sa bilog nga Pilipinas.
Kalakip sa mga lugar nga may pinakamadamu nga kaso sang dengue amo ang National Capital Region (NCR) nga may 3,898 ka mga kaso.
Ginsundan ini sang Central Luzon nga may 3,053 ka mga kaso kag Davao region nga may 2,707 cases.
Kalakip man sa mga lugar nga may pinakamadamu nga kaso amo ang Calabarzon (Cavite, Laguna, Batangas, Rizal and Quezon) nga may 2,699 cases kag Northern Mindanao nga may 2,380 ka mga kaso.
Suno sa DOH, nagasaka man ang kaso sang dengue sa panahon sang tig-ilinit, bangud sang ginabutang nga mga tubig sa “water containers” nga mahimo mangin breedings sites sang lamok nga nagadala sang dengue virus.*