Padayon nga nagadamu ang kaso sang leptospirosis sa Pilipinas.
Base sa datus sang Department of Health (DOH), nagsaka na sa 1,462 ang kaso sang leptospirosis sa nagkalain lain nga bahin sang pungsod, humalin sang Enero 1 tubtub Agosto 13, sini nga tuig.
Sang tinalikdan nga 2021, may yara lamang sang 1,249 ka mga kaso sang nasambit nga balatian sa Pilipinas, sa pareho man nga mga binulan.
Yari ang mga lugar nga may madamu nga kaso sang leptospirosis:
Metro Manila – 274 cases
Cagayan Valley- 174
Western Visayas – 174
Central Visayas- 118
Davao Region – 115
Central Luzon – 112
Samtang, 203 na ka mga persona ang nabawian sang kabuhi sa pungsod bangud sang leptospirosis, mas mataas ini sa kadamuon sang nagkalamatay sang tuig 2021, nga naglab-ot lamang sa 131.
Suno sa Department of Health (DOH), nagsaka ang kaso sang leptospirosis, sa panahon sang tig-ululan.
Kalakip sa mga sintoma sang balatian amo ang hilanat, pagsakit sang tutunlan, pagpalamula sang mata, pagpalangurog, tuman nga pagsakit sang ulo, pagsuka, diarrhea kag iban pa.
Suno sa mga eksperto, makuha ang leptospirosis pinaagi sa paghubog sa baha nga kontaminado sang ihi sang ilaga kag iban pa nga mga sapat nga may leptospira bacteria.
