Naabtan na sang kaagahon apang yara pa sa gihapon sa ere ang isa ka eroplano sa Tupelo, Mississippi sa Amerika.
Halin sang gab-i tubtob magkaagahon, makita nga nagalibot-libot lang sa ere ang gamay nga eroplano.
Sa ginpagwa nga flight radar tracking route sang utoridad, makita nga wala sang direksyon ang eroplano kag pila ka oras ini nga nagtiner sa ere.
Nadiskubrehan nga ang eroplano ang ginkawat gali sang isa ka empleyado sa isa ka aviation company sa lugar nga ginkilala kay Cory Wayne Patterson.
Isa ka Beechcraft King Air C90 ang nasambit nga eroplano.
Nanawag pa si Patterson sa mga kapulisan kag nagpamahog nga igahugpaas niya ang eroplano sa isa ka dako nga grocery store.
Ginpahalin sang utoridad ang mga tawo sa nasambit nga grocery store, pati na sa malapit nga gasolinahan.
Pila ka oras ang nagligad kag nakumbinsi sang kapulisan si Patterson nga indi na pagdayunon ang iya plano.
Apang ang problema, indi gali kabalo mag-landing si Patterson.
Si Patterson ang isa na ka dekada nga naga-obra sa Tupelo Aviation bilang isa ka lineman ukon manug-tughong sang aircraft.
Manug-ugto na sang nakalandling si Patterson sa isa ka bukid sa bulig sang isa ka private pilot. Wala man sang mga pilas si Patterson kag gilayon nga gin-aresto sang kapulisan matapos matigayon nga maka-landing.
Wala pa sa gihapon nahibaluan ang motibo ni Patterson.*
