Ginaka-alarma karon sang mga tag-iya kag mga empleyado sang mga balaligyaan sa palibot sang Libertad Public Market sa nagadamo nga kaso sang kinawatay.
Suno sa isa ka staff sang baligyaan nga Jaypee, nabiktima sila sang “salisi-gang” kun sa diin nakawatan sila sang duha ka cellphone, kalo kag sapatos.
Samtang, ang tupad pagid nila nga karenderiya ang ginkawatan man sang cellphone.
Suno sa nagaluto sang kalan-an nga si Mrs. Sayco, modus sang grupo nga mag order sang damo-damo nga pagkaon agud mangin masako ang mga staff kag sa tion nga makuha na sang mga ini ang ila target gilayon ini nga nagapalagyo.
Parehas man ang natabo sa isa ka kapehan sa Libertad Market kun sa diin, gin-ula sang suspek ang kape sa iya lamesa kag sang nagpalapit ang staff sa lamesa para trapohan may isa ka persona nga nagpalapit sa counter kag ginkuha man ang cellphone.
May kapareho man nga reklamo ang mga manugbaliya sang utanon sa bagsakan area.
Nagapanawagan ang mga tag-iya sang balaligyaan sa kapulisan sang Bacolod nga pasanyogon ang police visibility ukon pagpatigayon sang roving sa lugar.
Sini lang nga aga, isa man ka alyas Junjun nga taga Barangay Sum-ag ang gindumog sang mga pumuluyo sa kaiping nga Barangay malapit sa Libertad Market matapos madakpan nga nagpangawat sa duha ka manok panabong.
