KABANKALAN CITY – Patay na ang isa ka lalaki sang masapwan sa Brgy. Tan-awan sa siudad sang Kabankalan kaina sang aga sini lamang nga Lunes, Abril 24.
Base sa inisyal nga impormasyon, ginkilala ang biktima sa kay Ricky Rivera Figueroa, 37-anyos nga construction worker kag residente sang Sitio Darwan sa nasambit nga barangay.
Base sa pagpang-usisa sang kapulisan, nakit-an ang biktima nga nagadalagan kag ginalagas sang suspek nga ginkilala kay Regie Reyes, 37-anyos man nga laborer kag residente sang Purok 3 sa nasambit man nga barangay.
Nahibaluan man nga may una na nga nagluntad nga pagbinaisay sa duha samtang nagatilipon kag naga-inom sang makahulubog nga ilimnon sa pagsaulog sang kapiestahan sang nasambit nga barangay kagab-i sang Domingo, Abril 23.
Kaina sang aga, nakit-an na lamang sa likod sang backhoe ang bangkay sang biktima nga may duha ka buno sa nawala nga dughan, duha man sa natuo nga bahin sang likod, kag isa pa sa natuo nga bahin sang ulo.
Gindala pa ang biktima sa ospital apang gindeklarar ini nga dead-on-arrival.
Ginalantaw sang kapulisan nga posible nadakpan ini sang suspek nga nagresulta sa pagpangbuno.
Samtang “at large” ukon wala sa gihapon madakpan ang suspek.
