BACOLOD CITY – Nabiktima sang salisi ukon kawatan ang isa ka motorcycle shop nga nahamtang sa Gonzaga St., Brgy. 28, siudad sang Bacolod City kaina sang aga sini lamang nga Lunes, Abril 24.
Base sa report sang Bacolod City Police Station 6, natabo ang insidente takna las-9 kaina sang aga.
Makita sa Close Circuit Television (CCTV) footage sang shop nga nagpakunokuno nga customer ang suspetsado.
Kabahin sang modus operandi sini nga pasalahon ang staff pinaagi sa pag-order sang nagkalain-lain nga mga piyesa kag samtang nakatalikod ang staff, amat-amat sini nga ginkuha ang duha ka set sang brake kag clutch lever nga nagabalor sang P2,600.
Ginpanilagan man sini ang belt bag sang mekaniko nga si Johndave Villareiz nga nakatungtong sa pihak nga counter.
Agud matigayon nga makuha sang suspek ang iya target, nag-ayo naman ini sa isa ka staff nga malantaw sang piyesa kag sang nagsaka sa hagdan ang staff, didto niya naman amat-amat nga ginbuksan ang bag sang mekaniko kag ginkuha ang wallet sini.
Nahibaluan nga nakasulod sa wallet ang masobra P20K nga cash, mga identification (ID) cards lakip ang driver’s license sang biktima, duha ka original nga OR/CR sang motorsiklo kag pila ka mga dokumento.
Nakit-an man sa CCTV footage nga nakasuksok ang suspek sang pula nga polo kag may dala ini nga backpack.
Sa mga nakakilala sa suspek, palihog magpakig-angut sa pinakamalapit nga police station ukon magtawag sa mobile number nga 09173056630.
Nahibaluan man nga nabiktima man sang kapareho nga modus ang pila ka mga kalan-an sa palibot sang Libertad Public Market kun sa diin hungod nga mag-order sang madamo nga pagkaon ang suspek samtang nagapanilag kun ano ang pwede sini nga makuha.
Gilayon man ini nga magahalin sa tion nga makuha na ang ‘target’ nga pagkabutang kag bayaan ang gin-order nga wala mabaydan.
