Warning: graphic content
SAGAY CITY – Pilason ang isa ka gina-alegar “mauyon” nga lalaki matapos ginlampusan sang sadol sa ulo sang amay sang iya live-in partner sa Purok Taguhangin, Brgy. Paraiso, siudad sang Sagay.
Base sa report sang kapulisan, yara sa impluwensya sang makahulubog nga ilimnon ang biktima nga si Benjie Gonzaga, 33-anyos nga residente sang nasambit nga lugar.
Nagpadulong si Gonzaga sa balay sang kaingod sini nga si Renante Villacarlos, 54-anyos nga amay sang iya live-in partner.
Dugang pa sang nasambit nga report, didto nanghakat si Gonzaga kag namahog pa ini nga patyon ang iya live-in partner.
Nagkuha naman si Villacarlos sang sadol nga iya ginlampos sa ulo ni Gonzaga.
Nakaangkon si Gonzaga sang daku nga pilas sa ulo kag gindala ini sa ospital para sa nagakaigo nga pagbulong.
Gilayon naman nga nagpalagyo si Villacarlos bitbit ang sadol nga iya gingamit.
