Nakatalana nga magpadulong sa Estado Unidos para magpakigbahin sa isa ka kompetisyon ang mga dancers sang Barangay Granada nga nangin kampeon sa Street Dance kag Arena Dance Competition sang “Balik Yuhom” Masskara Festival sang Bacolod 2022.
Sa interview sang Radyo Bandera kay Councilor Jason Villarosa, Chairman sang Committee on Tourism iya ginpahayag nga ginapadasig na karon ang pagproseso sang mga dokumento para sa mga kinanglanon sang dancers para sa embahada sang Estados Unidos, pinaagi sang travel agency.
Suno pa kay Villarosa nga 15 ka dancers ang ginrekomendar nanday Councilor Em Ang kag sang Bacolod City Tourism Officer, nga magpakigbahin sa isa ka kompetisyon sa US apang ginhimo ini nga 25 ni Mayor Albee Benitez agud madamo ang makasaot kag makita ang kanamion sang performance sang Masskara Champions.
Tatlo ka grupo naman sang mga dancers nga gikan sa Pilipinas ang magapasakop sa kompetisyon nga gindihon sang Philippine Independence Day Council, nga nakabase sa Estados Unidos kag ginahiwat ini kada tuig.
Sang tinalikdan nga tuig, isa ka grupo sang dancers ang gin-imbitaran gikan sa Luzon, Visayas kag Mindanao, kun sa diin nagperform na ang Dinagyang sang Iloilo kag Sinulog sang Cebu sa nasambit nga kompetisyon, kag napilian naman ang Masskara Dancers sini nga tuig.
Ang kompetisyon ang pagahiwaton sa New York, Madison Square nga magasugod sa Hunyo 4 sini nga tuig kag masobra 10 ka mga grupo sang dancers ang maga-partisipar kag kalakip diri ang mga assosasyon sang nurses kag iban pa nga yara sa America.
Magatinir ang mga dancers sang Bacolod sa US sang isa ka semana para makapreparar sang malawig kag para mapakita sang husto ang manami nga talento sa pagsaot sang Bacolodnon.
Magluwas sa Estados Unidos, may mga kompetisyon pa sa South Korea kag Long Beach California nga pagasakopan sang mga dancers sang Barangay Granada.*
