CLEVELAND, TEXAS– Patay ang lima ka persona lakip na ang walo ka tuig nga bata matapos nga ginpangluthang sang kaingod nila balay bangud ginasaway lamang sang gahod.
Nagluntad ang insidente sa Cleveland, Texas.
Base sa report sang Reuters, padayon nila nga ginapangita ang suspek nga ginkilala kay Francisco Oropeza, 38-anyos.
Suno kay San Jacinto County Sheriff Greg Capers, isa ka AR-15-style semiautomatic rifle ang gingamit ni Oropeza sa krimen.
Dugang pa ni Capers nga “almost execution-style” ang ginhimo sang suspek sa mga biktima bangud naka-angkon sila sang igo sang bala sa ulo.
Nahibalu-an nga tumandok sang Honduras ang mga biktima.
Ginkilala ang mga biktima nga sanday Sonia Argentina Guzman, 25-anyos; Diana Velazquez Alvarado, 21-anyos; Julisa Molina Rivera, 31-anyos; Jose Jonathan Casarez, 18-anyos kag ang walo ka tuig nga bata.*
