Detinado sa karon ang tatlo ka mga persona matapos nga ginbuno sang mga ini ang nagtapas sang ila puno sang saging pasado las 8 kagab-i, Mayo 12 sa Hacienda Alegria, Barangay 5, sa banwa sang Isabela, Negros Occidental.
Ang tatlo ka mga suspetsado ang ginkilala nga sanday Ruel Pinoy, 32-anyos, Rodel Pinoy, 34-anyos kag Renato Reyes 59-anyos kag lunsay residente sang amo nga lugar, samtang ang biktima nga padayon nga ginabulong sa karon ang ginkilala naman kay Alberto Francisco, 49-anyos, may asawa, kag trabahante sa kampo.
Suno kay Police Captain Ryan Villasario, officer-in-charge sang Isabela Municipal Police Station, nga may yara na sang daan nga hiligutanon ang biktima kag mga suspetsado.
Antes paman ang pagpamuno kagab-i, nagmaoy kag gintapas ni Francisco ang puno sang saging nga gina panag-iyahan sang mga suspetsado sang Martes sang gab-i.
Dugang pa sang hepe nga nag-inom pa kagab-i ang tatlo ka mga suspetsado, antis mag padulong sa balay ni Francisco kag nanghangkat ang mga ini sang inaway.
Sang nag-gwa si Francisco sa iya puloy-an, gilayon ini nga ginbuno ni Rodel kag nagpuli man buno ang duwa pa sini ka mga kaupod.
Nag-angkon ang biktima sang pilas sa dughan kag sa iban pa nga parte sang lawas sini kag padayon subong nga ginabulong sa hospital, samtang ginahulat man sa karon ang ila desisyon kun mapasaka sang kaso batok sa tatlo ka mga suspetsado.*
