BACOLOD CITY – Nakilal-an na ang lalaki nga nasapwan nga utod ang ulo sa Hacienda Sagrado 2, Barangay Zone 16 sa syudad sang Talisay, Negros Occidental, Sabado sang gab-i, Setyembre 17, 2022.
Ginkilala mismo sang iloy nga si Anita Demetrio, 66-anyos, balo, nga ang biktima amo ang iya bata nga si Mario Demetrio, 48-anyos, kag residente sang Purok Sigay, Magsungay sa Barangay Singcang-Airport, syudad sang Bacolod, suno sa report sang Talisay Police Station.
Nagpadulong sa Del Lourdes Funeral Homes sa syudad sang Bacolod si Anita kag positibo nga ginkilala ang biktima.
Madumduman nga takna las 10:15 sang gab-i, Sabado sang makita ang lawas kag utod nga ulo ni Mario sa Access Road nga sakop sang Hacienda Sagrado 2. Ang duha ka kamot sang biktima ang nakagapos pa sa iya likod.
May tattoo nga “M.D. 4 BOYS” sa natuo sini nga abaga.
Wala pa una ma-identify ang biktima bangud wala sang ID nga nakita ang nagresponde nga kapulisan.
Ang utod nga ulo sini, nga may igo sang bala ang nakit-an mga pila pa ka kilometro ang kalayuon sa lawas sini nga may yara sang madamo nga lagob sa likod kag dughan.
Gin-alegar bugaw sa Goldenfield sa Bacolod si Mario, nga isa man ka staff sa store nga nagabaligya sang spare parts sang mga salakyan.
Gina-verify pa man sang kapulisan ang nagagwa nga impormasyon nga si Mario ang bugaw nga nag-transact sa customer nga nag-book sadto anay sa ginpatay man nga commercial sex worker nga si Rovily Alcantara Mahinay, 26-anyos, sadtong Setyembre 8.
Madumduman sa panaysayon sang live-in partner ni Mahinay nga naka-contact pa sa iya ang biktima kag ang iya sini nga bugaw nga may nag-book na sa iya nga customer takna las 10:30 sang gab-i sadtong Setyembre 7.
Nagsiling ang bugaw sa live-in partner sang biktima nga nagsakay sa auto si Mahinay.
Matapos sang insidente, ginwigit na lang ang biktima sa dalan kung diin ini siya nakit-an nga wala na sang kabuhi.
Maga-coordinate pa ang Talisay Police Station sa Bacolod Station 7 may angut sa ini nga kaso.*
