SAGAY, NEGROS OCCIDENTAL– Nasapwan na lamang ang 34-anyos nga lalaki nga wala na sang kabuhi sa iya gina-istaran nga payag-payag, kag ini ang gina-alegar naghikog.
Nagluntad ang insidente sa nabukid nga barangay sa siudad sang Sagay, pasado las-11:00 sang gabi, Setyembre 3.
Pahayag sang amay, antes pa man nasapwan ang iya anak, nagpangayo pa ini sang kwarta nga inugplete kuntani bangud luyag sini magkadto sa iya iloy nga yara sa Iloilo apang wala sang kwarta nga inughatag ang iya amay.
Matapos nga wala ginhatagan sang inug-plete, nakita na lamang ini nga isahanon nga naga-inom inom sang makahulubog nga ilimnon.
Las-11:00 sang gab-i, nasapwan ini sang iya amay sa iya gina-istaran nga payag nga gin-utas ini ang kaugalingon nga kabuhi gamit ang nylon nga ginhigot sa iya li-og.
Ginhingagaw pa dala sa Alfredo Marañon Sr. District Hospital ang biktima apang gindeklarar ini nga dead on arrival.
Nahibalu-an nga naga-supreher sang depresyon ang iya anak bangud pimri ini naga-inom sang makahulubog nga ilimnon.*
