Patay kag wasak ang nawong sang isa ka lalaki matapos ginpulihan sang labo sang lima ka mga suspetsado sa Purok 6, Brgy. Cambarus, banwa sang Pontevedra, Negros Occidental, takna las 8:45 sang gab-i, Sabado, Oktubre 28.
Ginkilala ang biktima kay Lito Martir y De Pedro, 42-anyos kag residente sang Purok 6 sa nasambit nga barangay.
Samtang, ginkilala naman ang mga suspetsado nga sanday Raymund Catague, Rensam Catague, Rico Catague, Rolan Catague kag Raffy Catague, lunsay mga residente sang nasambit nga lugar.
Base sa report sang Pontevedra Municipal Police Station, samtang yara sa sulod sang iya balay ang biktima, hinali na lamang nagsulod ang mga suspetsado nga may bitbit nga bolo kag sanggot.
Didto na nila ginpulihan sang labo ang biktima rason nga nakaangkon ini sang madamo nga pilas sa iya lawas nga gintunaan sang iya gilayon nga kamatayon.
Nadakpan naman ang isa sa lima ka mga suspetsado nga si Rico Catague samtang nakapalagyo naman ang apat pa nga kaupdanan sini nga sa karon padayon pa ginapangita sang mga kapulisan.*
