BACOLOD CITY – Lansihanay sa kawarta sa iligal nga transaksyon ang isa sa mga ginalantaw nga motibo sang Bacolod Police Station 2 sa pagluthang-patay sa anay priso nga si Raymundo Apelledo sa Brgy.3 Bacolod City sang nagligad nga gab-i Setyembre 18.
Sa interview sang Radyo Bandera Bacolod kay Police Captain Paul Vincent Pendon, hepe sang Police Station 2, ginpahayag sini nga ang biktima ang imbolbado sa tanan nga sahi sang kriminalidad sa ila area.
Nahibaluan nga napriso ini tinalikdan nga tuig 2017 matapos nga nagpatigayon sang operasyon batok sa iligal nga pasugal ang mga otoridad kag nakuhaan ini sang shabu.
Dugang pa ni Pendon, si Apelledo ang isa man sa ila suspek sa kaso sang carnapping, motornapping, robbery hold-up kag snatching sa ila nasakpan nga lugar.
Ginalantaw man nga tuman ang kaakig sang mga suspek sa biktima bangud sa kadamuon sang bala nga nakita sa crime scene nga amo ang 21 ka empty shells sang 9mm nga kalibre sang pusil.
Sa karon nagapadayon pa ang imbestigasyon sang kapulisan sa posible pagkakilala sa mga suspetsado.*
